مراسل الكنبة لشئون الطيران/ فتحي أبو جناح.
نقلا عن مراسلنا لشئون الطيران فتحي أبو جناح أن الطيار أبو اليسر بسبب المنظرة جاب ورا وبيته اتخرب رسمي فهمي نظمي ، وعشان نفهم القصة
من كام شهر الخلوق المثقف ملهم الجيل محمد رمضان ركب طيارة تبع شركة خاصة والشيطان وزه هو والطيار وقعد يسوق الطيارة والطيار وقف يصوره ويقول معانا كابتن طيار محمد رمضان ،اللي قعد مكان الطيار وقال بحمد الله أول مرة أسوق طيارة وكفاءة بإذن الله... والفيديو اتنشر ع السوشيال ميديا والفاس تقع في الراس والشركة تشم خبر وتوقف الطيار ويقعد في البيت .
الطيار اشتكى لمحمد رمضان ومحمد رمضان وعده إنه هيشغله في شركة طيران تبع حد صاحبه إماراتي ، وبالفعل الطيار أبو اليسر بعت السي في الخاص به لمحمد رمضان عشان يبعته لشركة الطيران بتاع صاحبه اللي رفض يشغل الطيار بحجة إنه مفصول من شغله ومينفعش يشغله عنده...
الطيار من ساعتها عمال يهاتي ويصوت ويولول ويقول خربت بيتي يا محمد يا رمضان منك لله... عايز منك 9 مليون جنيه مكافأة نهاية خدمة ضيعتهم عليا...
تفتكروا مين غلطان ابن رمضان ولا الطيار الغلبان؟
#الساخر